A MATANZA DO PORCO

A matanza do porco, máis alá dun pormenorizado estudo sobre o proceso da mata, é un exercicio de memoria antropolóxica de costumes, rituais e traballos que esmorecen ou que en moitos casos xa só perduran na lembranza.
Ademais, o libro é unha homenaxe ao seu protagonista, o porco, animal venerado durante doce meses (“Non era mala vidiña, se durase…” dicíalle o burro nunha das maxistrais Cousas de Castelao) mais ao que sempre lle chega o seu San Martiño, día de festa na casa e remedio de fame para o ano.
Lacóns, cacheiras, chourizos, ósos de soá, paxarela... as distintas partes deste totémico animal reciben a súa pequena exaltación neste libro, porque, parafraseando a John Barlow: do porco, todo menos o cuiñar.