PACO

Un ratiño entrañable vai á Lúa. E pronto saberemos que a Lúa non é de queixo fresco, pero si moi tenra.
Unha vez na Lúa, Paco decatouse de que non todo era como el pensaba e sentiu morriña de todo canto lle resultaba familiar. Pero tamén descubriu que a Lúa pode ser un berce acolledor, cálido e melodioso.
“Paco” é unha obra poética que fala de nostalxia e amizade. A autora, Paula Carballeira, é unha coñecida narradora oral que traballa como contacontos, escritora e actriz de teatro e televisión. Publicou con KALANDRAKA as obras tituladas “Mateo”, que recibiu unha mención de onra do Gremio de Libreiros de Cataluña, e "Smara”, que foi galardoada co Premio Isaac Díaz Pardo ás Mellores Ilustracións e incluida pola Biblioteca Internacional da Xuventude (Munich) na prestixiosa selección ‘The White Ravens’.
Nas ilustracións, que destacan pola súa gran calidez,
empregouse unha técnica mixta a base de collage e ceras brandas. Blanca Barrio compatibiliza o seu labor no ensino coa faceta como ilustradora de libros infantís.