A PENA DO VIGIA

As historias d’A Pena do Vigia estám tecidas e bordadas com anacos da alma de José Alberte Corral. Desde os mesmos ex-ergos que as encabeçam, anacos de poemas alguns e de cançons. Mas os relatos ham-se dotar também de historias que contar, nom avonda com as melhores palavras para que o coraçom do leitor sinta a chegada da literatura, senom que aquelas devem ser palhinhas com as que se forme o agocho onde aninhe o passaro que canta umha historia que atinge o universo inteiro e dura por toda a eternidade, umha historia memorável, digna de permanecer na memoria da estirpe humana. Na Pena do Vigia imos atopar as pegadas dumha infância num paraíso nacido na lembrança, um “locus aemenus” que se lhe debuxa na alma cos lápis de cores daquilo que fugiu nas ás do vento e que, para o autor/narrador, é Monte Alto. No médio imos atopar relatos que nos levam à “guerrilla” latino-americana, à militância clandestina e, mesmo à própria clandestinidade coma se ela mesma fosse um lugar onde habitar um tempo da vida desde o que alviscar umha liberdade que se quere conquistar coma umha terra prometida, coma um porto de arribada. Porque essa arela de liberdade atravessa A Pena do Vigia de lado a lado, é o ponto fulcral sobre o que se loita a cada intre por obter o estado de equilíbrio espiritual que a alma humana persegue.